Fréttir

Ársskýrsla Kvennanefnd Harðar 2023

Nánar: Flokkur: Fréttir; Skrifað þann Fimmtudagur, nóvember 09 2023 18:55; Skrifað af Sonja

Harðarkonur er félagsskapur kvenna í Herði 18 ára og eldri. Ný kvennanefnd tók við 2022 og hana skipa.
Elín Hrönn Jónasdóttir
Guðný Guðlaugsdóttir
Guðrún Hildur Pétursdóttir
Harpa Groiss
Sædís Jónasdóttir
Kristjana Þórarinsdóttir
Olga Rannveig Bragadóttir
Íris Grettisdóttir.

Markmið kvennanefndar er að skapa vettvang fyrir allar konur í Herði að hittast, fara í reiðtúra saman og skipuleggja árlega Kvennareið. Nefndin hóf dagskrá sína í lok mars 2023 með reiðtúrum tvisvar í mánuði. Hugsunin á bak við reglulega reiðtúra var að þjappa hópnum saman og kynnast fyrir Kvennareið. Viðburðir voru auglýstir á facebook síðu Harðarkvenna. Boðið var upp á mat gegn vægu gjaldi eftir reiðtúra að hætti Kristjönu Þórarinsdóttur, en hún er veitingastjóri hópsins. Aðstaðan í reiðhöllinni var nýtt í hitting eftir reiðtúra og eru Harðarkonur þakklátar félaginu fyrir þá aðstöðu sem er til fyrirmyndar. Eftir einn reiðtúrinn var t.d boðið upp á kynningu á Brokk öryggisvestum fyrir hestamenn sem er bylting í öryggismálum hestamanna. Harðarkonur fóru í nokkrar heimsóknir þar sem vel var tekið á móti okkur. Olga Bragadóttir og eiginmaður grilluðu fyrir okkur í Fitjakoti og í Litlu Kvennareiðinni fórum við að heimsækja Sillu Vignisdóttur á Vindhól inn í Helgadal. Í báðum heimsóknum fengum við höfðinglegar móttökur. Í stóru Kvennareiðinni í lok maí var farið í heimsókn á Ólafshaga þar sem við dönsuðum línudans og gæddum okkur á veitingum frá Kristjönu. Um kvöldið var grill í reiðhöllinni ásamt dansi.
Góð þáttaka var á viðburðum kvennanefndar og almenn ánægja. Kvennanefndin gefur kost á sér aftur fyrir árið 2024 með smá breytingum. Íris Grettisdóttir lætur af störfum og Margrét Ólafía Ásgeirsdóttir kemur í hennar stað. Gjaldkeri Harðar Ragnhildur Birna Traustadóttir hefur verið nefndinni innan handar að halda utan um fjármál viðburða og fær hún bestu þakkir fyrir.
Kvennanefndin er spennt að fara skipuleggja viðburði fyrir Harðarkonur 2024.

Fyrir hönd Kvennanefndar

Elín Hrönn Jónasdóttir

Ársskýrsla Æskulýðsnefndar Harðar 2023

Nánar: Flokkur: Fréttir; Skrifað þann Fimmtudagur, nóvember 09 2023 13:14; Skrifað af Sonja

æ1.png

Páskaleikir

Laugardaginn 1. apríl voru haldnir páskaleikir þar sem um 35 krakkar mættu og leystu alls kyns skemmtilegar þrautir. Leikirnir hentuðu öllum aldrei og höfðu allir krakkarnir gaman að því að spreyta sig á þeim undir dynjandi tónlist og skemmtilegri stemmingu. Í lokin fengur allir þátttakendur páskaegg fyrir að taka þátt.

Áseta og líkamsvitund

Í október var boðið upp á fræðslu um ásetu og líkamsvitund þar sem farið var yfir ýmsar æfingar án hests sem gerir okkur meðvitaðri og færari í að hafa tilfinningu fyrir líkamanum og stjórna ásetu okkar betur. Leiðbeinendur voru Thelma Rut Davíðsdóttir reiðkennari og Berghildur Ásdís Stefánsdóttir sjúkraþjálfari.

Landsmótshópur barna, unglinga og ungmenna barna

Verið er að búa til landsmótshóp fyrir börn, unglinga og ungmenni sem stefna á úrtöku og keppni á landsmóti hestamanna í júlí 2024. Þar verður haldið vel utan um hópinn og ýmislegt skemmtilegt og fróðlegt verður innifalið í þeirri þátttöku. Verið er að móta stefnu hópsins og setja upp skipulag fyrir veturinn til að undirbúa þau sem best fyrir komandi keppnisár.

Nudd og teygjuæfingar fyrir hesta

Í nóvember verður sýnikennsla og námskeið um ýmsar nudd- og teygjuæfingar fyrir hesta. Farið verður yfir ýmsar skemmtilegar æfingar sem knapar geta gert til að liðka hesta sína og stuðla að heilbrigðari hesti. Þetta eykur fjölbreytni í þjálfun og byggir upp tengsl milli knapa og hests. Leiðbeinendur eru Thelma Rut Davíðsdóttir og Nathalie Moser.

Aðrir viðburðir

Því miður náðist ekki að halda fleiri viðburði þetta árið vegna þess að það bráðvantar fleiri foreldra til að sýna þessu mikilvægu starfi áhuga og vera tilbúin að taka þátt. Formaður hvetur eindregið foreldra til láta gott af sér leiða og bjóða sig fram að vera í þessari nefnd þannig að hægt verði að bjóða upp á fleiri viðburði til að byggja börnin okkar upp með okkur í hestaíþróttinni.