Nánar

Skrifað þann Laugardagur, júní 20 2026 21:52

Skrifað af Sonja

Á mánudaginn næstkomandi 22.júní mun hefjast námskeið sem er hugsað sem undirbúningur fyrir Landsmót! Námskeiðið er einungis ætlað knöpum sem fara fyrir hestamannafélagið Hörð á Landsmót bæði í yngri og eldri flokkum sem og varaknapa!
Námskeiðið samanstendur af tveimur 30 mínútna einkatímum, æfingarennsli út á velli og aðstoð á æfingum fyrir norðan þegar þangað er komið!

Einkatímarnir verða annars vegar út á velli og hins vegar inn í gerði/reiðhöll eftir veðri. Þar er lagt áherslu á einstaklingsmiðaða kennslu með þjálfun og undirbúning fyrir Landsmót að leiðarljósi.

Æfingarennslið er hugsað þannig að riðin verði sérstök forkeppni líkt og á landsmóti og fá knapar þá æfingu og punkta í kjölfarið.

Þegar komið er norður verður kennari til taks á æfingatímunum sem getur leiðbeint knöpum og fylgt þeim alla leið í ferlinu.

Skráning er hafin inn á abler.io/shop/hfhordur og stendur til hádegis mánudaginn 22.júní

Tímasetningar verða birtar í kjölfar skráningafrests um 13:00 inn á abler og því mikilvægt að knapar fylgist vel með í appinu!

Ef það eru óskir um sérstakar tímasetningar er mikilvægt að setja það í athugasemd eða senda skilaboð á Thelmu Rut.

Kennari námskeiðsins er Fredrica Fagerlund
Verð: 18.000kr

Dagsetningar eru eftirfarandi:
22.júní – Þjálfunarstund inn í reiðhöll/Gerði (Stóra höll/Hvíta gerði)
 17:00-22:00

24.júní – Einkatímar á vellinum (Stóri völlur)
 17:00-22:00

29.júní – Æfingarennsli Sérstök forkeppni (Stóri völlur)
 17:00-19:00

Fyrir norðan
Félagið mun raða niður á æfingatíma svo tímar með aðstoð geta raðast niður á eitthvað af eftirfarandi tímum sem verður auglýst þegar nær dregur
2.júlí – Æfing á vellinum (Hólar)
 17:00-18:00
3.júlí – Æfing á vellinum (Hólar)
 11:00-12:00
4.júlí – Æfing á vellinum (Hólar)
 22:00-23:00
Tímasetningar eru með fyrirvara um skráningu 🙂

Nánar

Skrifað þann Mánudagur, júní 15 2026 13:25

Skrifað af Sonja

Fyrri úrtaka var haldin 9. og 10.6. og svo Gæðingamót Harðar og seinni Landsmótsúrtaka helgina 13-14.júni.
Gæðingamótið fór vel fram, það var æðislegt veður og var fullt af flottum hestum og knöpum sem mættu til leiks.
Fyrri úrtakan fékk aðeins síðra veður en margir áttu samt mjög góðar sýningar.

Við munum senda út hverjir eiga rétt á sæti á Landsmóti frá hestamannafélaginu Herði á næstu dögum þegar farið hefur verið yfir allar niðurstöður úr úrtökum.
Hörður á 6 sæti í hverjum flokki utan A-flokks ungmenna og B-flokks áhugamanna þar sem félagið á 3 sæti.

Nánar

Skrifað þann Fimmtudagur, júní 11 2026 15:16

Skrifað af Sonja

Á morgun, 12 Júni verður Álafosshlaupið.
Það er verið að ræsa kl 18:00 og farið þessa hefðbundnu leið:
Garðarstrætið meðfram Hádegisfellinu að Hafravatni,
upp Hafravatnsbrekkuna og beint yfir að Skarhólabraut,
þaðan áfram stíginn að Krikahverfi,
undir Reykjaveginn framhjá Meltúni
og þaðan að Stekkjarflötinni aftur niður að Varmásvæðinu.

Síðustu hlauparar ættu að vera að skila sér í mark uppúr kl 19.

Biðjum við okkar hestafolk að taka tillit til þeirra óskum þáttakendum góðs gengis.

Nánar

Skrifað þann Þriðjudagur, júní 09 2026 11:25

Skrifað af Sonja

Heimilt er að sleppa hrossum í beitarhólf á vegum félagsins föstudaginn 12. júní næstkomandi.
Notendur beitarhólfa skulu gæta að því að fara varlega með hólf þar sem spretta er skammt á veg komin, ekki randbeita til dæmis, taka hross inn hluta sólarhrings eða jafnvel gefa hey með.
Það er nokkuð misjafnt ástand á hólfum og mikilvægt að meta í hverju tilfelli.
Það er Mosfellsbær sem ákveður hvenær má sleppa hrossum á beit, það miðast við að sem flest hólf séu orðin vel hæf til beitar. Það er svo lagt í hendur beitarhafa að meta ástand einstakra hólfa og að hver og einn sýni skynsemi og fari vel með hólf sem viðkomandi hefur til umráða.

Allir gæta þess nú sem áður að hafa nóg rafmagn á girðingum enda er það eitt af skilyrðum þess að fá úthlutað beit.

Vaktaplanið varðandi að fanga laus hross er líka komið í gildi, því sinna þeir sem fá beit og það er annað skilyrði þess að fá beit.

Vaktaplanið er sett inn á Harðarfólk hópinn, skilað til lögreglu og Mosfellsbæjar.