Félagsvinna á Landsmóti

Nú fer að líða að Landsmóti sem er í Reykjavík að þessu sinni eins og allir vita. Landsmót ehf, þar sem ég sit í stjórn, kom á þeirri stefnu að fá hestamannafélögin aftur að Landsmótunum með virkum hætti. Við gerðum það þannig að öll léttari störf á svæðinu eru unnin í sjálfboðavinnu af félögum í hestamannafélögunum. Félag viðkomandi starfsmanns fær svo greiddar 1.500.- krónur fyrir hverja unna vinnustund. Tilgangurinn með þessu fyrirkomulagi er tvíþættur, annars vegar að færa Landsmótið nær hestamannafélögunum og gefa félagsmönnum innsýn í framkvæmd mótanna, hins vegar að færa fjármuni frá Landsmótunum inn í félögin þar sem þau nýtast til góðra hluta í félagslífinu.  Þetta fyrirkomulag var fyrst notað fyrir norðan á síðasta ári og gafst mjög vel. Félögin fyrir norðan voru duglegust, en fast í hæla þeim kom Hörður sem átti lang flesta tíma félaga af sunnanverðu landinu.  Við ætlum okkur að sjálfsögðu að gera enn betur í ár og hvetjum sem flesta til að skrá sig til vinnu, annað hvort hjá Rögnu Rós sem er að skipuleggja þetta með starfsmönnum Landsmóts eða á netfangið This email address is being protected from spambots. You need JavaScript enabled to view it.

Þetta er tilvalið tækifæri til að kynnast innviðum Landsmótsins og safna í sjóði Harðar í leiðinni.  Ef 30 félagar skrá sig og vinna einn dag hver þá gera það 360 þúsund til félagsins.  Við Anna tókum einn dag í fyrra og skemmtum okkur konunglega, ég í gulu vesti á verði í brekkunni og Anna í því ábyrgðarmikla hlutverki að kveikja og slökkva á veltiskiltunum við brautina.

Helstu störf á vöktunum vöktum eru eftirfarandi:

Hliðvarsla, Aðstoð við fótaskoðun, Innkomustjórnun, Upplýsingamiðstöð, Aðstoð á skrifstofu, Ýmis störf á svæði og aukavaktir

Starfsmenn vaktana skulu hafa náð 18.ára aldri.

Starfsmenn hafa aðgang að mótinu á meðan á vöktum þeirra stendur en fá ekki almennan aðgöngumiða. Einnig má nefna að starfsmönnum er skaffaður matur á meðan á vakt stendur.

Sjáumst á Landsmóti, kveðja Guðjón formaður